كلمات يابوي
يابوي رمز المجد والعز والدين والمرجله والمقدره والشهامـه
اللي طغى ذكرك في كل الميادين زعيم كنك منخلق للزعــــامــه
لو قلت كفك غيث كل المساكين إخضرّ غصن وغرّدت لي حمامه
وسمعت أصوات العرب بالملايين تقول عز الله صدق في كلامه
من ألف وتسعميه واحد وسبعين وللعام هذا وانت رمز الكرامه
من الخيج العربي لآخر الصين والمجد في صدرك معلق وسامه
لو قلت يا (فزاع) رايح على وين باقول مدري غير فكري ما دامه
متوجهٍ لك يا حفيد السلاطين أكيد انه يرتقي من مقامه
انا مسوي لي قصيده في عشرين بيت ولك في كل بيت علامه
ايامنا يا طيب الراس يومين يوم ولدنا به ويوم القيامه
والفهم يطغى في عقول الفهيمين على التعنت والجهل والغشامه
الناس منقسمين يابوي قسمين والكل منهم مختلف في نظامه
والاستقامه درب ماهو بدربين والمستقيم يقدر الاستقامه
والشين كل الزين في محجره شين ومن التشاؤم يبتلش في منامه
وما كل دمعه عين تنزل من العين فراق أو هجران ولا ندامه
ترى دموع العاشقين المحبيين سميتها نسخة من الابتسامة
اخترت لك باقه شعر من بساتين فكر تحت ظلك رقى للغمامه
والشعر ماهو ينحصر فـ الدواوين الشعر بقى في القلوب احترامه
الا انت وين وين من نافسك وين يا عاتق المجد الاصيل وسنامه
لو قالو الاهرام ورث الفراعين تراك ورث المرجله والشهامه
الشاعر فزاع كلمات أخرى