Album: other songs

Südstadt Verzäll Nix

Ich däät dir jään saare, ich hing noch an dir,
weil, do häss mich tatsächlich ens fasziniert

Kumm Südstadt, verzäll nix,
do merks doch, dat mer dich usstrix
markier nit, datte nit durchblicks – verzäll nix.

Dat drinn ess, dat dich wer op vornehm dressiert,
jed einzelne Lachfalt kosmetisch verschmiert.
Ahl Mädche, dat nervt mich,
nä janz bestimmt, dat enttäusch mich,
un ich daach, ich kenn dich – usswendisch.

Ich weiß noch, wie do
als ich e Kind woor, ussochs.
Do hatts selfs Format,
als du en Trömmere loochs.
Irjendwie undefinierbar,
jedenfalls nit kalkulierbar,
du woors unmanipulierbar,
wunderbar.

Met dingem Parfüm uss Ashalt un uss Schweiß
woorste wirklich do selfs, och wenn de hück jähn so deiß,
als wöör dir alles dat peinlich.
Mensch Mädche, bess du hück kleinlich,
do weeß mir langsam unheimlich - peinlich.

Do küss mir so vüür, als wenn de ussjestopp wöörs,
och wenn ding Fassade et Jäjendeil schwört.
Leev Südstadt, verzäll nix,
do merks doch, dat mer dich usstrix,
markier nit, datte nit durchblicks – verzäll nix.